Solardyń biri – Gaıdar Jolamanov. Qurylys salasynda taban aýdarmaı otyz úsh jyl eńbek etip kele jatqan ol – tek sheber maman ǵana emes, óziniń eńbekqorlyǵymen de, qarapaıym qalpymen de qurmetke ıe bolǵan azamat. Qazir ol – BCN Group kompanııasynda brıgadır. Onyń qaramaǵynda 23 adam eńbek etedi. Árqaısysy Gaıdardyń uqyptylyǵy men talapshyldyǵyna boı úıretken mamandar.
Gaıdar Jolamanov Shyǵys Qazaqstan oblysy, Qaıyńdy aýylynda dúnıege kelgen. Arnaýly oqý ornyn támamdaǵan soń, áskerı boryshyn teńiz jaıaý áskerinde óteıdi. Keıin týǵan aýylyna oralyp, mektepte dene shynyqtyrý jáne eńbek páninen oqýshylarǵa sabaq beredi. Biraq naryq qyspaǵy, toqyraý jyldaryndaǵy jumyssyzdyq pen qymbatshylyq aýyl muǵalimin otbasymen birge Almatyǵa júr-júrleıdi. Qalaǵa kelgen azamat talaı jumystyń basyn shalyp kóredi. Alaıda birtindep qurylys salasyna den qoıyp, sony ómirlik jolyna aınaldyrady.
«Ustazdyq úıretpegendi muqtajdyq úıretedi» deıdi qazaq. Qurylys – bala kezdegi armanym bolmasa da, turmystyń qajettiligi osy salaǵa alyp keldi. Qarapaıym qurylysshynyń kómekshisi bolyp bastadym. Jumys qolaıyma kelgen soń, oraıy da kelisti. Sóıtip otbasymdy asyradym. Áıelim, bala-shaǵam úshin qajymaı eńbek ettim. Rýhymdy shırattym. Artynsha bul jumys ózime de unap ketti. Osylaısha bul ómirimniń mańyzdy bólshegine aınaldy», deıdi keıipkerimiz.
Gaıdardyń bul saladaǵy tártibi men talapshyldyǵy kezdeısoq qalyptaspaǵan. Ol munyń bárin áskerı qyzmetpen baılanystyrady. «Áskerde júrgende tártippen júrýge daǵdylandym. Keıin ol qabilet qurylys salasynda kórindi. Balam da áskerde bolǵannan keıin, qurylysta meniń daǵdylarymdy óz boıynan kórsetip júr», dedi bilikti qurylysshy.
Budan keıin keıipkerimizden qurylys salasynda eskeretin eń mańyzdy dúnıeniń ne ekenin surap kórip edik, julyp alǵandaı «qaýipsizdik», dedi Gaıdar Jolamanov.
«Qaterli jaǵdaılardyń onnan toǵyzy qaýipsizdik tehnıkasyn saqtamaýdan shyǵady dep aıtýǵa negiz bar. Qurylys alańynda tártip bolmasa, apattyń aldyn alý qıyn. Sol úshin qataldyq tanytatyn sátter bolady. Biraq bári jumysshylardyń amandyǵy úshin», dep túsindirdi ol.
Gaıdar Jolamanovtyń 23 jastaǵy uly Tımýr da qurylys salasynda. Bala kúninen ákesiniń janynda júrip ósken ol da teńiz jaıaý áskerinde qyzmet etip, keıin qurylysqa birjola bet burǵan. Qazir ákesiniń jolyn qýyp, tájirıbesin ıgerip keledi.
Sóıtsek, bul otbasydaǵy qurylysqa degen yqylas tek áke men ulǵa ǵana tán emes eken. Gaıdardyń jary Elena Kalıakberova da uzaq jyldar boıy sylaqshy bolyp eńbek etken. Qazir bala kútimine baılanysty demalysta. Bir qyzyǵy – ákesi, anasy, balasy – úsheýi keıde bir qurylys nysanynda qatar jumys isteıtin bolǵan. Biz ázil-shynymyzdy aralastyryp: «Aǵa, qurylys júıkeni juqartatyn sala. Jumys barysynda baıqamaı áıelińizge ne balańyzǵa brıgadır bolyp ursyp qoımaısyz ba?» dep suraǵanymyzda, keıipkerimiz kúlip:
«Ondaı da bolǵan. Qurylys sanaǵa salmaq, júıkege júk túsiretin jumys qoı. Biraq úıge jetkende bári umytylady», dedi.
Sonymen qatar Gaıdar Jolamanov qurylys salasyndaǵy qazirgi jaǵdaıdy da ashyq aıtyp otyr. Onyń sózinshe, jastar bul salaǵa kóptep kelip jatqanymen, kóbi buǵan ýaqytsha jumys retinde ǵana qaraıdy.
«Biraz jas jigitter qurylysqa tabys úshin ǵana keledi. Sebebi, ósý baspaldaǵy áli jetile qoıǵan joq. Qurylysshylardyń ózderi salatyn úıden ózderine de páter buıyrsa, nur ústine nur. Sonda eńbekke degen yqylas artady, nátıje de joǵary bolady», deıdi ol.
Iá, qurylys – jaı ǵana mamandyq emes. Ol – ómir salty, jaýapkershilik pen tabandylyqtyń úılesimi. Gaıdar Jolamanovtyń áýleti – osynyń dáleli. Atadan balaǵa jalǵasqan eńbek, bir otbasynyń ǵana emes, tutas qoǵamnyń órkendeýine qyzmet etip keledi. Qıyndyǵy kóp bolǵanymen, adamǵa baspana, elge kelbet syılaıtyn bul salada yqylaspen eńbek etip júrgen jandar qashanda qurmetke qurmetke laıyq.
